नेपालीहरूको महान् पर्व बडादसैँ (शारदीय नवरात्र) को औपचारिक समापन सूचक कोजाग्रत पूर्णिमा तथा पूर्णिमा व्रत आज (२०८३ कार्तिक ८ गते, आइतबार) देशैभर श्रद्धा र भक्तिपूर्वक मनाइँदै छ। आश्विन शुक्ल प्रतिपदाका दिनदेखि सुरु भएको १५ दिन लामो दुर्गापक्ष आजैका दिनदेखि विधिवत् रूपमा समापन हुन्छ।

शास्त्र अनुसार आजको दिन धनधान्यकी देवी महालक्ष्मीको पूजा-आराधना गर्नुका साथै घटस्थापनाका दिन राखिएको जमरा तथा पूजा सामग्रीहरू पवित्र नदी वा जलशयमा विसर्जन गर्ने परम्परा छ।

'को जाग्रत' र रात्रिकालीन जागरण

'को जाग्रत' अर्थात् 'को जागिरहेछ?' भन्ने शब्दबाट बनेको कोजाग्रत पूर्णिमाको रात महालक्ष्मीले पृथ्वी लोकको भ्रमण गर्ने र रातभर जागेर आफ्नो भक्तिमा लीन हुने भक्तजनलाई धनधान्य र समृद्धि प्रदान गर्ने धार्मिक विश्वास रहिआएको छ। यसै मान्यताका आधारमा आजको रात घर-आँगन सफासुग्घर गरी दीप प्रज्वलन गरेर रातभर जाग्राम बस्ने र श्रीसूक्त तथा लक्ष्मी मन्त्रको जप गर्ने गरिन्छ।

यसैगरी तराई क्षेत्र तथा देशका विभिन्न स्थानमा रातभर जाग्राम बस्ने क्रममा कौडी वा पासा खेल्ने परम्परा पनि रहेको छ।