मथुरामा ट्याक्टर पल्टियो, सहचालकको ज्यान गयो; चालक उपचाररत

Nepal NB News

२५ असोज २०८३, आइतवार

बल्कोटबाट सन्धिखर्कतर्फ रोलर लोड गरेर जाँदै गरेको लु.४ त ७९१७ नम्बरको ट्याक्टर सडकमा विपरीत दिशाबाट आइरहेको लु.७२ प २०६३ नम्बरको मोटरसाइकलसँग जोगिने क्रममा नियन्त्रणबाहिर गयो र सडकको दाहिनेपट्टि पल्टियो।

दुर्घटनामा ट्याक्टरका सहचालक पाल्पाको रैनादेवी छहरा गाउँपालिका–२ सोमडी बस्ने करिब २२ वर्षीय गणेश रास्कोटी मगर ट्याक्टरमुनि च्यापिएर गम्भीर घाइते भए। जेसीबीको सहयोगमा उद्धार गरी उनलाई जिल्ला अस्पताल सन्धिखर्क पुर्‍याइयो। तर उपचारमा संलग्न चिकित्सकले दिउँसो १२:१० बजे उनको मृत्यु भइसकेको घोषणा गरे।

ट्याक्टर चालक रुपन्देहीको तिलोत्तमा नगरपालिका–११ का २६ वर्षीय पुण्यप्रसाद थारु पनि घाइते भएका छन्। उनी जिल्ला अस्पताल सन्धिखर्कमा उपचाररत छन् र उनको स्वास्थ्य अवस्था मध्यम बताइएको छ।

मोटरसाइकल चलाइरहेका अर्घाखाँचीकै छत्रदेव गाउँपालिका–४ केरुङ्गाका ४१ वर्षीय सञ्जय पाण्डे भने सकुशल छन्। तर उनको मोटरसाइकल पूर्ण रूपमा क्षतिग्रस्त भएको छ।

घटनास्थलमा खटिएको प्रहरी टोलीले उद्धार कार्यसँगै आवश्यक अनुसन्धान गरेको छ। प्रारम्भिक विवरणअनुसार ट्याक्टर चालकले मादक पदार्थ सेवन गरेका थिए र उनीसँग सवारी चालक अनुमतिपत्र थिएन। प्रहरीले घटनाको थप अनुसन्धान जारी राखेको जनाएको छ।

प्रकाशित : २५ असोज २०८३, आइतवार 14:55