एयरबसलाई ७५ वटा विमानको ऐतिहासिक अर्डर, ACG को इतिहासकै सबैभन्दा ठूलो सम्झौता

३० असोज २०८३, शुक्रवार

विमान भाडामा उपलब्ध गराउने विश्वकै अग्रणी अमेरिकी कम्पनी एभिएसन क्यापिटल ग्रुप (ACG) ले युरोपेली विमान निर्माता कम्पनी एयरबस (Airbus) सँग ७५ वटा ए३२०नियो (A320neo) फेमिली विमान खरिदका लागि सम्झौता फाइनल गरेको छ। यो सम्झौता ACG को करिब ४० वर्ष लामो इतिहासकै सबैभन्दा ठूलो एकल विमान अर्डर हो।

ACG को माउ कम्पनी टोकियो सेन्चुरीका अनुसार ७५ वटा विमानको कुल सूचीकृत मूल्य (List Price) करिब १२ अर्ब अमेरिकी डलर (लगभग १.८५ ट्रिलियन जापानी येन) रहेको छ। यी विमानहरूको डेलिभरी सन् २०३२ देखि २०३५ को बीचमा हुने तालिका सार्वजनिक गरिएको छ।

लोकप्रिय र पर्यावरणमैत्री विमानहरू

यस ऐतिहासिक सम्झौतामा एयरबसको सर्वाधिक लोकप्रिय सिंगल-आइल (साँघुरो बडी भएका) ए३२०नियो (A320neo) र ए३२१नियो (A321neo) मोडलका विमानहरू समावेश छन्। नयाँ प्रविधियुक्त यी विमानहरूले पुराना पुस्ताका विमानको तुलनामा कम्तीमा २० प्रतिशत कम इन्धन खपत गर्ने र कार्बन उत्सर्जन पनि सोही अनुपातमा घटाउने एयरबसले जनाएको छ।

रणनीतिक महत्व र बजारको माग

हाल विश्वभरका एयरलाइन्सहरूले नयाँ विमानको अभाव झेलिरहेका छन्। भविष्यमा विमानको मागलाई सम्बोधन गर्न र आफ्ना ग्राहकहरूलाई समयमै सेवा दिन ACG ले उत्पादन स्थान (Production Positions) वर्षौँ अगाडि नै सुरक्षित गरेको हो। यस नयाँ अर्डरसँगै ACG ले एयरबससँग अर्डर गरेका कुल विमानहरूको सङ्ख्या १९० पुगेको छ।

विश्व बजारमा एयरबसको बजार हिस्सा बलियो बन्दै जाँदा अर्को प्रमुख एभिएसन फाइनान्स कम्पनी एभोलन (Avolon) ले पनि हालै एयरबससँग ७५ वटा ए३२०नियो र ३५ वटा ए३३०-९०० गरी कुल ११० विमानको ठूलो अर्डर दिएको छ।

प्रकाशित : ३० असोज २०८३, शुक्रवार 15:47