जनकपुरमा चक्कु प्रहारबाट युवकको मृत्यु, अर्का एक गम्भीर घाइते

Nepal NB News

२३ असोज २०८३, शुक्रवार

जनकपुरधाम। धनुषाको जनकपुरधाम उपमहानगरपालिका–५ स्थित रहिम पथनजिक पुरानो रिसइबीका कारण भएको चक्कु प्रहारको घटनामा एक युवकको मृत्यु भएको छ भने अर्का एक जना गम्भीर घाइते भएका छन्।

मृत्यु हुनेमा जनकपुरधाम उपमहानगरपालिका–५ सोनारपट्टी दाहा चोकका २४ वर्षीय आमिन साफी रहेका छन्। घटनामा सोही स्थानका २५ वर्षीय इम्तियाज राईन गम्भीर घाइते भएका छन्। दुवै जनाको छाती तथा पेटमा धारिलो हतियार प्रहार भएको बताइएको छ।

घटनामा संलग्न रहेको आरोपमा प्रहरीले स्थानीय २२ वर्षीय मोहमद इलसाद खानलाई नियन्त्रणमा लिएको छ। घटनाको थप अनुसन्धानका लागि उनकी ४२ वर्षीया आमा सैमुन खातुनलाई समेत प्रहरीले नियन्त्रणमा लिएको छ।

गम्भीर घाइते राईनको प्रादेशिक अस्पताल जनकपुरमा उपचार भइरहेको छ। घटनाको कारण तथा अन्य पक्षबारे प्रहरीले थप अनुसन्धान गरिरहेको जनाएको छ।

प्रकाशित : २३ असोज २०८३, शुक्रवार 11:39