ट्रम्पद्वारा मतदाता धाँधलीबारे सूचना दिनेलाई १० लाख डलर पुरस्कार घोषणा

Nepal NB News

११ कार्तिक २०८३, मङ्गलवार

काठमाडौं । अमेरिकी राष्ट्रपति डोनाल्ड ट्रम्पले विगतका निर्वाचन तथा सन् २०२६ को मध्यावधि निर्वाचनमा भएको मतदाता धाँधलीबारे सूचना दिनेलाई १० लाख अमेरिकी डलर पुरस्कार दिने घोषणा गरेका छन् ।

उनले आफ्नो सामाजिक सञ्जाल 'ट्रुथ सोसल'मा यस्तो घोषणा गरेका हुन् । धाँधली गराउने व्यक्ति पक्राउ परी अदालतबाट दोषी ठहर भएपछि मात्र सूचना दिनेले पुरस्कार पाउने उनले लेखेका छन् ।

ट्रम्पले लेखेका छन्, विगतका निर्वाचन वा आगामी मध्यावधि निर्वाचनमा मतदाता धाँधलीबारे जानकारी दिने जोकोहीलाई धाँधली गराउने व्यक्ति दोषी ठहर भएपछि १० लाख डलर दिइनेछ ।

अमेरिकामा मध्यावधि निर्वाचन आगामी नोभेम्बर ३ मा हुँदैछ । राष्ट्रपतिको चारवर्षे कार्यकालको मध्यमा हुने यो निर्वाचन प्रत्येक दुई वर्षमा हुने नियमित संसदीय निर्वाचनको हिस्सा हो । यसमा प्रतिनिधिसभाका सबै ४३५ सिट र सिनेटको करिब एकतिहाइ सिटका लागि मतदान हुन्छ । साथै देशभरका विभिन्न राज्य तथा स्थानीय तहमा पनि निर्वाचन हुनेछ ।

द वाल स्ट्रिट जर्नलले सेप्टेम्बरमा प्रकाशित गरेको सर्वेक्षणअनुसार ट्रम्पको अनुमोदन दर ३७ प्रतिशत रहेको छ । सन् १९९० यता मध्यावधि निर्वाचनअघि राष्ट्रपतिहरूको अनुमोदन दरबारे उक्त प्रकाशनले गरेका सर्वेक्षणमध्ये यो सबैभन्दा न्यून हो ।

प्रकाशित : ११ कार्तिक २०८३, मङ्गलवार 11:29