चितवनमा तीन सवारीसाधन एकआपसमा ठोक्किँदा १० जना घाइते

Nepal NB News

११ कार्तिक २०८३, मङ्गलवार

चितवनको इच्छाकामना गाउँपालिका–०४ धारापानीस्थित पृथ्वी राजमार्गमा तीनवटा सवारीसाधन एकअर्कासँग जोरिँदा १० जना घाइते भएका छन्।

कात्तिक १० गते (२०८३) बिहान करिब ९:२० बजे काठमाडौंबाट मुग्लिङतर्फ जाँदै गरेको बागमती प्रदेश ०३–००१ ज १२५९ नम्बरको माइक्रो र विपरीत दिशाबाट आइरहेको बागमती प्रदेश ०३–००१ ख २७७७ नम्बरको बस ठोक्किएको थियो।

नियन्त्रण गुमाएको सो बस त्यसपछि काठमाडौंबाट मुग्लिङतर्फ नै जाँदै गरेको प्रदेश १–०२–००२ ख ६१३ नम्बरको ट्रकसँग पनि ठोक्किएको थियो।

दुर्घटनामा बस र माइक्रोमा सवार १० जना घाइते भएका हुन्। उनीहरूलाई उपचारका लागि कुरिनटारस्थित सशस्त्र प्रहरी पृथ्वी हाइवे ट्रमा सेन्टर र इच्छाकामना गाउँपालिका अस्पताल पुर्‍याइएको छ।

इच्छाकामना गाउँपालिका अस्पताल, कुरिनटारमा उपचाररत घाइतेहरूको हालसम्मको विवरण यस्तो छ:

माइक्रोमा सवार घाइते:
१. बाराको निजगढका ४२ वर्षीय कुमार जोशी
२. नवलपुरको कावासोती नगरपालिका–०३ का ३८ वर्षीय खेमबहादुर गुरुङ
३. नवलपुरको कावासोती नगरपालिका–०३ का ४२ वर्षीय मुराबहादुर कुमाल

बसमा सवार घाइते:
४. झापाको दमक नगरपालिका–०३ की ४८ वर्षीया कल्पना पोखरेल
५. झापाको बिर्तामोड नगरपालिका–०५ का २२ वर्षीय रोमन भट्टराई

अन्य पाँच घाइतेको ठेगानासहितको नामावली अझै प्राप्त हुन बाँकी छ। दुर्घटनाबारे थप अनुसन्धान भइरहेको छ।

प्रकाशित : ११ कार्तिक २०८३, मङ्गलवार 11:46