बाढीले पुरिएका घर उत्खनन गर्दा ५.५ तोला सुन र नगद फेला, घरधनीलाई हस्तान्तरण

Nepal NB News

१४ असोज २०८३, बुधवार

नुवाकोट । नुवाकोटमा बाढीले पुरिएका घरहरू उत्खनन गर्ने क्रममा सशस्त्र प्रहरीको टोलीले सुन, नगद तथा महत्वपूर्ण कागजात फेला पारी सम्बन्धित घरधनीलाई हस्तान्तरण गरेको छ।

मिति २०८३ असोज १३ गते सशस्त्र प्रहरी बल, नेपाल नं. १९ गुल्म हे.क्वा. नुवाकोटबाट खटिएको टोलीले विदुर नगरपालिका–१ स्थित त्रिशूली बजारमा बाढीले पुरिएका घरहरूमा उत्खनन तथा खोजी कार्य गरेको थियो।

सो क्रममा टोलीले अन्दाजी ५.५ तोला सुन, नगद ५ हजार रुपैयाँ तथा केही महत्वपूर्ण कागजात फेला पारेको थियो। फेला परेका सामग्री स्थानीयवासीको रोहवरमा सम्बन्धित घरधनीहरूलाई हस्तान्तरण गरिएको सशस्त्र प्रहरी बलले जनाएको छ।

बाढीका कारण पुरिएका घर तथा संरचनामा खोजी र उत्खनन गर्ने क्रममा फेला परेका सामग्री सुरक्षित रूपमा सम्बन्धित व्यक्तिलाई बुझाइएको हो।

प्रकाशित : १४ असोज २०८३, बुधवार 12:46